Información xeral, Municipais 2023

O BNG PRESENTA UN EQUIPO PARA GOBERNAR MORAÑA

Deixa un comentario

Un equipo para #GobernarMoraña

A organización nacionalista presenta o primeiro tramo da candidatura que concorrerá ás municipais do mes de maio

📌 O BNG Moraña é a primeira organización política en dar a coñecer o equipo de persoas que ocuparán os seis primeiros postos da candidatura ás eleccións municipais do domingo 28 de maio.

📝 Logo de confirmar no pasado mes de outubro que Marcos Suárez sería o candidato á Alcaldía de Moraña, agora dase a coñecer que as persoas que o acompañarán nos primeiros postos da candidatura serán Rubén Monteagudo (concelleiro e actual Responsable Local do BNG), Mariña Búa (concelleira do BNG), Lucía Silva (veciña de Amil e vice-responsábel local), Ruth Caramés (veciña de Laxe) e Diego Oliveira (veciño do Calvo en Rebón). A decisión foi tomada nunha concorrida asemblea local que respaldou o traballo feito polo grupo municipal nacionalista apostando polos seus membros para encabezar un equipo que pelexará pola vitoria electoral o 28 de maio.

➡️ Marcos Suárez, cabeza de lista do BNG, detalla que “este primeiro tramo que presentamos é un equipo para gobernar Moraña. Un equipo de persoas comprometidas que acumulan xuventude, ilusión e futuro, pero tamén unha ampla experiencia no traballo feminista, social, cultural e experiencia e de xestión no ámbio da administración público e sector privado. Suárez continúa relatando que “este equipo para gobernar Moraña está formado por mulleres e homes coñecidas e relevantes no noso concello, plenamente conscientes de que Moraña merece máis e preparadas e ilusionadas para traballar no proxecto de futuro que dende o BNG temos deseñado para imprimirlle un cambio de rumbo a Moraña a partir do 28 de maio”.

➡️ Suárez é consciente de que “a veciñanza está ollándonos con moita atención e agardando unha alternativa seria e fiable para iniciar un novo e necesario ciclo en Moraña, algo que está máis preto ca nunca. Dende o BNG podo asegurarlles que tanto as persoas que formamos o primeiro tramo xunto co resto das 21 mulleres e homes da candidatura formamos un equipo sólido e de garantías para gobernar, xestionar , modernizar e devolverlle o peso político que Moraña perdeu. Estaremos á altura”.♻️ A lista completa do BNG de Moraña, que incluirá varias novidades máis, está previsto que sexa presentada publicamente a todas as veciñas e veciños o domingo 16 de abril nun gran acto público no que o BNG de Moraña xa está traballando e planificando.#PreparadasparaGobernarMoraña#MorañaMereceMáis Moraña, 15 de marzo de 2023 – Imaxes de Cathy Varela ———————

—————–🟣🟣 Breve referencia sobre as persoas do primeiro tramo da candidatura

🔹Marcos Suárez Redondo é o actual Portavoz do BNG de Moraña. Ten 49 anos, veciño de Mos en Saiáns, está casado e é pai de dous fillos. É Enxeñeiro Agrónomo e Enxeñeiro Técnico en Industrias Agrarias e Alimentarias e é funcionario da Xunta de Galicia.

🔹Mariña Búa González, veciña de santa Lucía, ten 30 anos, é Farmacéutica e Dietistanutricionista. Rexenta unha empresa local de cosmética natural. Implicada no movemento nacionalista e no tecido asociativo local dende moi nova.

🔹Lucía Silva Gago, ten 25 anos, veciña de Amil. Taberneira de nacemento, xurista de formación. Foi Secretaria da Comunidade de Montes de Amil. Implicada no movemento nacionalista dende moi nova.🔹Rubén Monteagudo Fernández, ten 37 anos, veciño de Santa Lucía, pai, músico, mestre de educación musical e Secretario Comarcal da CIG-ENSINO. Presidente do Club Acuático Umia. Participa dende moi novo no tecido cultural e asociativo de Moraña e na actualidade é presidente da Asociación cultural Peña Espetados.

🔹Ruth Caramés Blanco, ten 43 anos, veciña de Penagrande na parroquia de Laxe, nai. É licenciada en Bioloxía e posgrao en Enxñería Ambiental e ilustradora gráfica. Foi fundadora de Fabaloba, cooperativa de xestión cultural e dinamización lingüística. Colaboradora do xornal Nós Diario.

🔹 Diego Oliveira Aboy, ten 31 anos, veciño do Calvo en Rebón. É enxeñeiro de Minas e Master en Enxeñería Ambiental. Ampla experiencia no sector medioambiental e na redacción e execución de proxectos tanto do sector público como privado. Deportista aficionado dentro do mundo do ciclismo.

Actos, Información xeral

MULTITUDINARIA MOBILIZACIÓN DO POBO DE MORAÑA ANTE OS RECORTES NO CENTRO DE SAÚDE

Deixa un comentario

🗣️ A manifestación desbordou todas as previsións, con máis de 600 veciños e veciñas esixindo nas rúas a fin dos recortes no centro de saúde.

A marcha contou coa presenza do deputado do BNG Luis Bará e a responsabel de política municipal do BNG e veciña de Moraña Eva Villaverde e percorreu as principais rúas do centro urbano de Santa Lucía onde centos de veciñas pediron o fin dos recortes no centro de saúde, clamaron contra a ampliación do mesmo e pola resposición urxente das vacantes médicas. Xa diante do Concello, onde remataba a manifestación, Rubén Monteagudo, responsábel local do BNG pedía un calusoro aplauso e apoio aos traballadores/as do centro de saúde lembrando que “nunca e en ningún caso teñen eles/as a culpa”. Pola súa parte Carmen Fariña, veciña de Moraña e traballadora do SERGAS, foi quen leu o manifesto final lembrando cronoloxicamente todos os recortes que levan sufrindo dende hai anos a veciñanza de Moraña, nomeadadmente a perda do pediatra, da matrona e a ausencia constante de médicos/as, o que leva a que centos de usuarios do centro leven máis de 5 meses sen médico/a asignado e polo tanto, sen poder obter unha cita para atención primaria.

O voceiro municipal do BNG Marcos Suárez remataba o acto agradecendo a labor dos profesionais sanitarios e a presenza activa do PSDeG de Moraña, lamentando así mesmo a flagrante ausencia do Alcalde de Moraña, quen, en palabras de Suárez “carece de empatía e respecto ás veciñas e veciños, non só por non vir, senón polas manifestacións feitas nas últimas horas”. Suárez rematou lembrando o orgullo de vivir en Moraña e dunha veciñanza “que non cala nin outorga, unha veciñanza que está en pé e que hoxe dixo abonda, nun mensaxe claro e contundente ao Partido Popular, Xunta e Sergas“.

A mobilización foi unha das maiores na historia de Moraña, só comparada ás realizadas hai máis de 20 anos contra o Encoro.


📸 Galería de imaxes: https://www.facebook.com/bngmorana/posts/pfbid0rob3rU3o5rSzCi7rZhTWfHxEktRWx3ChvBU3ajDydEo5uzi2n96HJcLCzmPULGB7l

Información xeral

O BNG ESÍXELLE AO SERGAS A URXENTE REPOSICIÓN DO SERVIZO DE PEDIATRÍA EN MORAÑA

Deixa un comentario

O BNG chamará á veciñanza a secundar todas as mobilizacións,recollidas de sinaturas e actuacións que sexan necesarias para que se repoña o servizo de pediatría.

➡️ Unha vez máis o centro de saúde de Moraña queda sen servizo de pediatría. Hai agora tres anos, en 2018 o noso centro de saúde estivera máis de 70 días sen este servizo, que finalmente e logo dunha gran mobilización veciñal, se repuxera parcialmente, malia que para daquela moitas veciñas e veciños decidiran utilizar o servizo de pediatría do concello veciño de Caldas de Reis

.➡️De novo moitas usuarias e usuarios deste servizo en Moraña contactaron co BNG indicándonos que xa non hai servizo de pediatría en Moraña e que están derivando a todas as crianzas ao servizo de Caldas, moi maltratado tamén polos recortes do Partido Popular na sanidade pública en xeral e na atención presencial da mesma en particular

.➡️Para o BNG de Moraña o servizo de Pediatría existente no noso concello é fundamental e moi necesario, e así o entende tamén a poboación afectada, moi pendente e preocupada estes días por este feito. Dende o BNG somos conscientes dende hai anos que as verdadeiras intencións do goberno da Xunta do Partido Popular son destruír e demoler a nosa sanidade pública, castigando aos poucos o servizo ata que ás veciñas e veciños non lles quede outro remedio que acudir a citas privadas, cuestión que moitas familias nin tan sequera se poderían permitir

.➡️En palabras do voceiro municipal Marcos Suárez “esta é unha nova agresión aos nosos dereitos. Non podemos perder cada dous ou tres anos un servizo tan importante como o depediatría no noso concello, non podemos permitir que o Partido Popular continúe a esnaquizar a nosa sanidade”. Suárez explica que “ante esta situación dende o BNG vimos de iniciar unha campaña na demanda da restitución deste importantísimo servizo no centro de saúde, así como a continuación da campaña pola volta á atención primaria”

.➡️ O voceiro municipal explica que “dende o BNG rexistraremos nas vindeiras horas unha moción para debate urxente no pleno municipal e tamén un escrito dirixido á Xunta de Galiza para reclamar o que é un dereito fundamental, o dereito á saúde e a unha atención adecuada deste servizo público básico”

.➡️ Suárez tamén fai un chamamento ao “goberno municipal do señor Cela a que deixe de estar desaparecido e sentado no sillón e se preocupe e actúe a este respecto. Pedímoslle ao PP de Moraña que non asuma sen máis o desmantelamento de servizos imprescindibles do noso concello e que presione todo o posible ao Sergas e ao goberno amigo da Xunta para revertir estes recortes” asegura o concelleiro nacionalista

.➡️ De continuar esta situación nos vindeiros días chamaremos dende o BNG á veciñanza a secundar todas as mobilizacións, recollidas de sinaturas e manifestacións necesarias que se poñan en marcha para revertir este novo recorte no noso centro de saúde no caso de que o SERGAS non ofreza unha solución inmediata.

Por uns servizos públicos de calidade! A sanidade é un dereito, non un negocio!

Información xeral

O BNG CUALIFICA DE PERDA DE TEMPO OS PRIMEIROS 6 MESES DE XESTIÓN DO NOVO ALCALDE DE MORAÑA

Deixa un comentario

Moraña, 13 de abril de 2021.

O BNG de Moraña lamenta a perda de tempo que significaron para Moraña estes primeiros seis meses de goberno “continuísta” do señor Cela. O Grupo nacionalista lembra a sensación que ten a maioría da cidadanía sobre este goberno do Partido Popular, unha sensación de parálise e despreocupación total e de falta absoluta de presencia e resolución dos problemas e prioridades de Moraña “Con esta opinión tan estendida no noso concello queda claro que os gobernos do partido Popular en Moraña tocaron fondo” asegura o voceiro do grupo municipal do BNG, Marcos Suárez.

Suárez afirma que “aínda que o cambio de goberno gañou no diálogo, o xeito de actuar segue sendo o mesmo”. Lembramos por exemplo “a creación da AulaWifi, unha proposta do BNG que se aprobou no primeiro mes de novo mandato e que se nos explicou que se faría realidade en 2-3 meses, e a día de hoxe os nosos estudantes e resto de persoas que preparan probas seguen sen ter a posibilidade dun acceso digno e dun lugar seguro e tranquilo para o estudo”

No inicio do seu mandato, o actual Alcalde explicaba que as obras ían ser “unha prioridade para o goberno do PP”. Seis meses despois tivemos que asistir ás protestas de ducias de veciños e veciñas, incluso de lugares enteiros que en pleno século XXI aínda seguen sen servizos públicos básicos como o saneamento, cuestión á que o Alcalde dá portazos día tras día dicindo que “non hai cartos”. O PP só se preocupou neste tempo do rescate, por un importe de 115.000 euros dunhas parcelas urbanísticas da rúa 7 produto dunha fallida operación urbanística privada.

Suárez tamén lembra que “a día de hoxe, o noso concello dispón de dúas obras paralizadas e das que nada se sabe: as do campo de Fútbol de Mirallos, previstas para ser rematadas en xuño de 2020 e a unidade de atención ao Alzhéimer en Alende, tamén prevista para rematar hai agora un ano e da que o goberno municipal non foi quen de traballar para desatascar e levar a cabo dende o mes de outubro”. “O Partido Popular tampouco estivo a carón do tecido social, xa que non foi quén de ter ideas propias e traballar conxuntamente cos diferentes sectores. Deste xeito a única axuda directa que recibiu o tecido asociativo parte dunha proposta do BNG dentro dun paquete presentado pola nosa organización chamado `Reactivar Moraña` de maio de 2020”, indica o voceiro nacionalista.

“O goberno do señor Cela,- indica Suárez – “ tampouco axudou en nada a paliar a grave terceira onda que afectou a Moraña, sen atender as demandas xeralizadas da poboación a realizar un cribado masivo no peor momento da pandemia. O Goberno municipal estivo ausente e sen ofrecer ningún tipo de información diaria nas canles comunicativas oficiais dos casos COVID19, previsións e medidas a tomar”

Suárez tamén lamenta “non sabermos nada das actuacións prometidas electoralmente polo PP. Non foron quen de avanzar nada nos proxectos que presentaron como fundamentais para este mandato, como son a Recuperación e adecentamento da área da Pontenova no entorno do Río Umia, a posta en valor da explanada de Mos ou a rede de fibra óptica en todos os núcleos de poboación”.

Suárez tamén lembra que “o goberno do PP segue sen adoptar medidas para tentar frear a perda de poboación acelerada que está padecendo o noso Concello, cuestión que continúa ser unha sangría xa que nos últimos 9 anos en Moraña hai 355 habitantes menos. Tamén temos que lamentar a completa desaparición da programación cultural no noso concello, unha cuestión máis necesaria ca nunca nestes tempos, nos que se podían realizar actividades, sempre cumprindo coa normativa COVID e cos horarios de toque de queda para dinamizar as parroquias e axudar tamén ao tecido cultural do noso concello”.

En definitiva, para o BNG de Moraña estes seis meses foron unha absoluta e lamentable perda de tempo. Moraña está padecendo un goberno de parálise absoluta, un goberno en decadencia e sen proxecto político de futuro para o noso Concello.

Información xeral

Asina pola recuperación da atención presencial en moraña

Deixa un comentario

Asina aquí

——

      Esta pandemia ocasionada polo COVID-19 puxo ao límite o noso sistema sanitario. Puxo en evidencia o preciso que é investir en saúde, todo o contrario ao ocorrido nos últimos anos. A pandemia puxo de relevo que precisamos un sistema sanitario público forte, cunha Atención Primaria reforzada como porta de entrada, sen recortes, que permita responder ás necesidades de saúde da poboación e na que o persoal sanitario conte con recursos para que as persoas doentes poidan recibir a atención que precisan en cada momento e estar ben dimensionado para abordar as emerxencias sanitarias cando xurdan.

     Diante da pandemia a Xunta tomou a decisión de reducir drasticamente a asistencia presencial tal como pasa no centro de saúde de Moraña e nos PACs, restrinxir consultas, probas diagnósticas e intervencións cirúrxicas nos hospitais. A decisión que tomou o SERGAS foi que a atención se centrara preferentemente na consulta telefónica, cuestión que está ocasionando moitas dificultades tanto aos profesionais para poder prestar a asistencia sanitaria como no acceso da poboación á mesma, xa que os profesionais están sobrecargados de traballo e cun esgotamento físico e mental insoportable e os veciños/as estamos a soportar colapsos habituais e diarios no teléfono do centro, colas á intemperie para acceder ao centro e listas de espera de varios días, entre sete e dez na actualidade, para conseguir só unha cita telefónica.

    As persoas abaixo asinantes consideramos que a resposta á situación de pandemia non pode estar baseada en incrementar as restricións de acceso á asistencia ao sistema público, porque supón un claro risco para a saúde da poboación.Esta situación pode levarnos a un problema de saúde colectiva, de cronificación de patoloxías,de atención tardía...É preciso desconfinar a sanidade pública e reactivar a atención presencial con máis persoal,máis información e máis accesibilidade. É preciso dar resposta ás demandas de atención pola COVID 19, mais tamén ao resto das patoloxías. Por todo isto demandamos á Xunta de Galicia a: 

• .- Realizar de inmediato todas as accións precisas para activar a atención presencial no centro de saúde de Moraña para dar resposta ás demandas de atención pola COVID 19, mais tamén ao resto das patoloxías e rematar coas listas de espera neste nivel asistencial, co persoal e as medidas de prevención de contaxios precisos, para garantir unha atención sanitaria digna á poboación. 


• .- Aumentar no noso centro de saúde o número de profesionais que sexa preciso para permitir aumentar o tempo e a calidade da atención asistencial así como incorporar as categorías profesionais imprescindíbeis para formar equipos multidisciplinares e prestar unha atención integral: psicólogos/as clínicos e/ou psicólogos xerais sanitarios, nutricionistas, terapeutas ocupacionais, logopedas, podólogos/as..

Web do Bloque Nacionalista Galego de Moraña