Preguntas, demandas e iniciativas do BNG no pleno de decembro

No pleno do pasado venres fixemos un total de 14 preguntas, demandas e suxestións ao goberno municipal que nos achegaron moit@s veciñ@s sobre diversos temas de importancia en varias parroquias e lugares do noso concello, desta volta lugares como San Lorenzo, Sabadín, Santa Lucía, A Amil , así como solicitudes e iniciativas para mellorar diversos aspectos e cuestións referentes ao noso concello e ao benestar d@s veciñ@s. Deixámosvos aquí a relación das interpelacións ao grupo de goberno do PP:

1.- O CONCELLO DEBE DAR EXPLICACIÓNS E TRANSPARENCIA AO RESPECTO DO CATASTRAZO

Dende o BNG-MORAÑA queremos unha explicación pública de como vai afectar o Catastrazo no noso Concello. Pensamos que o goberno municipal debe ser o máis transparente posible e tamén a respecto do Catastrazo, xa que é unha cuestión que afecta a un número considerable de veciñ@s.

2.- O CONCELLO CONTINÚA A PERDER POBOACIÓN

O BNG quere saber que medidas vai adoptar o concello ao respecto de conseguir 5000 habitantes. Lembrámoslle ao goberno municipal que neste senso houbera unha proposta feita polo PP cunha moción que está aprobada.

3.- PLAN DE OBRAS VIARIAS PARA O ANO 2015

O noso portavoz Marcos Suárez preguntoulle ao goberno municipal se tiña definido un plan de obras viarias para o ano 2015. A este respecto tamén demandou explicacións arredor das actuacións que se incluíron no Plan Marco.

4.- SANEAMENTO EN SABADÍN E BOMBEO EN PORTAMOS

Continúa sen estar arranxado o Saneamento solicitado polo noso grupo xa hai máis dun ano no lugar de Sabadín, queremos saber cal é o estado desta obra, así como o estado da obra de bombeo en Portamos ante a previsión de novas choivas nas vindeiras semanas.

5.- PISTA DEPORTIVA DA AMIL

Unha das promesas do Partido Popular antes de chegar ao goberno era o proxecto de cuberta da pista deportiva da Amil. 3 anos e medio despois continuamos sen saber nada. Finalmente vaise a realizar?, hai realizado xa algún tipo de xestión?

6.- GRADARÍA DO PAVILLÓN VELLO DE SANTA LUCÍA

Dende o BNG queremos sinalar que a bancada do pavillón vello está roto. Deberíase cambiar ou arranxar canto antes, xa que este pavillón tamén é utilizado polos nenos do CPI.

7.- PONTE DOS PORTIÑOS

A respecto desta ponte temos varias preguntas:

– Como van as obras da Ponte dos Portiños?
– Previsións remate? Que saben de ocupacións ilegais de fincas?
– Quen dirixe a obra?
– Con que criterios se encargou a redacción do proxecto(técnico que asina é fillo dun recoñecido militante do PP)
8.- SEN NOVAS SOBRE A LIMPEZA DO PERÍMETRO DO CPI

Nun dos plenos do 2014, o grupo municipal do BNG solicitoulle ao grupo de goberno que intentase facer unha limpeza integral no perímetro do CPI Santa Lucía debido ao seu mal estado en liñas xerais. A este respecto comprobamos poucas novidades, por iso preguntamos cales son os avances hai ao respecto da limpeza do perímetro do devandito centro público.

9.- SEN NOVAS SOBRE O ARRANXO DE MARQUESIÑAS DE DIVERSAS PARROQUIAS

Outro dos incumprimentos da Alcaldesa, que en plenos anteriores prometera o arranxo destas marquesiñas. Por iso temos que volver preguntarlle cales son avances hai ao respecto de marquesiñas para Sta Xusta, Paraños e Chan (Amil).

10.- PRAZA DE ABASTOS DE SANTA LUCÍA

A que se debeu a visita coa Aparelladora á Praza de Abastos? Non hai un proxecto xa redactado?.

11.- ESTADO DA ACTUACIÓN PREVISTA NA CARBALLEIRA DA FEIRA VELLA

Que pensa facer o goberno municipal ao respecto da Actuación prevista na Carballeira da Feira Vella?.

12.- LICENZA PARA EXECUTAR OBRAS NO POLÍGONO MIRALLOS

Dende o BNG queremos saber o ocorrido ao respecto da entrega da licenza a unha empresa para executar obras no Polígono de Mirallos?.

13.- NOVO VERQUIDO NUN RÍO DE MORAÑA

Solicitamos tamén información arredor de se hai constancia dun verquido a un río en Moraña que se produciu o 3 de decembro (mércores).

14.-  LIMPEZA NO MERCADO (FEIRA) DE SANTA LUCÍA

Voltamos a comprobar dende o grupo municipal do BNG a falta de limpeza despois das feiras mensuais de Santa Lucía e rogamos ao goberno municipal que tome medidas ao respecto.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.